سلفينى دموعك أبكى
ع اللى فات
أصل دمعى نشفه
فرحى اللى مات
قولت تبقى الشكوى
ليكى مش لغيرك
ما انتى عمرك تكرهى
فينا السكات
غصب عنى إن يوم
شكيت لك أو شكيتك
كان عشانك بعت عمرى
واشتريتك
كنت شايف روحى بيك
أكبر كتير
ليكى بس إخترت عضمى
أساس لبيتك
ما تعيرنيش بالعجز
يوم لو جيت ألومك
داانا اللى فارش جتتى
مطرح لنومك
وأنا اللى فاتح صدرى
١٠٠ خط لدفاع
وكنت بهتف ف الجموع
اليوم دا يومك
ومكنش قصدى إنك
تشاورى ف يوم عليا
رغم اللى كانوا بيهتفوا
بشوفوا بعنية
وكنت صابر ع المحن
ولا هونتى يوم
علشان ماتعلى ف وقتها
تاخدى بإيديا
فاتت سنين ف العد
أكتر م الخطاوى
بصرخ وادندن ف البكى
إسمك غنواى
وبرتلك آيات
أحصن بيها قلبى
واعمل طبيبك ف الوهن
وابقى المداوى
فاتح ضلوعى لكل
من جالك زيارة
فارش فؤادى ليك
وليهم ١٠٠ عمارة
ولامرة قلت إنك
ف يوم رح تنكرين
مع إن عارف مكسبى
أكبر خسارة
لكن بحبك غصب عنى
ومش بإيدى
عايشة ف كيانى وتسبقى
الدم ف وريدى
مع إن حاسس
إنى إبنك بالتبنى
بفرح لفرحك
حتى لو ما يكنش عيدى