الحب زى المرض
لا يلين ولا ينطاع
مكروب بيعدى القلوب
ويجلب الأوجاع
واجعص جعيص يتعدى
وينشرى وينباع
يابو قلب حتة حجر
وعاملى فيها بتاع
مين اللى يقدر يقاوح
ويعاند التيار
لو بالغرام ا بتلى
والقلب جمرة نار
دانا كنت زى الجبل
شامخ شموخ احرار
واما الفؤاد ابتلى
شوفت الجبل بنهار
اسمع ملام والكلام
أوقات كتير يدبح
تعز نفسي اشتكى
او افارق المطرح
فيه اللى قال اختشى
والباقى لو تسمح
ماانا بين شوية بتوع
بتسب وتقبح
يا رب تبلى اللى لامنى
وتجرعه بلواى
وأنا اللى ازفه بكلامى
من هناك ع الجاى
واقوله يا هل ترا
الحال معاك ازاى
يا بنى اللى يشرب عسل
معرفش طعم الشاى