بقى هما دول اللى اشتروك؟
طب واللى باعك مين؟
مين اللى كاره صحبتك
واندس وسط العاشقين؟
شايف ملامحك ع الخريطة
بتنحنى بتبصى فين
وبتستغيثى من الوجع
ودندنى بصوت الأنين
حواليك ولادك كلهم
وأنا منهم بصرخ معاك
وكلهم شايلين همومك
قبل ما يشيل م عصاك
بس انتى شاورلى وكلنا
من قلبنا هانقول أمين
مين اللى ينفع لك عريس
ويكون أمين على كل شيئ
وعمره ما يساوم عليك
أو يوم يطيق إنك ف ضيق
وتنامى على صدره الحنون
مطمنه لآخر الطريق
وتكونى أهله ودنيته
ويغير عليك لو م الصديق
محناش هنرفض أو نعارض
بس شاورى ما تخافيش
دااحنا ف قلوبنا من الشجاعة
اللى بيصنع ألف جيش
ياللى انتى اسمك كلنا بنردده
ع الصبح يبقى شق ريق
اطمنى يام الولاد السمر قومى
ولملمى بإدينا طرفك
وخدينا تحت عبايتك الخضرة
اللى بيها الكل عارفك
بكرة اللى جاى لك بالأمانى
عريس هايدفع كل مهرك
ويزيح هموم القهر واحنا
هانسندك ونشد ضهرك
ونزوقوكى بفجر تطلع
شمسه بكر لجيل جديد
علشان ما نخلق عصر يشهد
اننا مافيناش عبيد
اطمنى هانزيح غيوم
كل السحاب وكلنا هنطيع أوامرك
اطمنى