قوليلى مين ف الهوا
نابه اللى نابنى وتاب
يا سكنة قلبى وساكنك
وانتى لسة شباب
كان لسة توبك مطرز
بالخضار والطمى
واقفة قصاد الزمن
تنستنى بكرة الجى
وفرشة حجرك دفى
ع المسطبة والغيط
أشم ريحتك تسابقنى
لحضن البيت
وأشوف صورتك ف كل
وشوشنا يوم ورا يوم
ماغبتش لخظة ولو
حتى إن غلبنى النوم
تجينى ف المنام واقفة
بتوب اخضر
وأشوف نفسي ف ريح
منك على منبر
وكل الناس بتهتف لك
وبتنادى
تضميهم بضمة أمي
لولادى
وفجاءة صحيت على الدمعة
اللى ف عيونك
وصرخة اه تزلزلنى
يا ناكرة بانى محبوبك
ابص لصورتك الحلوة
اللى ملقتهاش
وبسال عنى ف الزحمة
تقولى ان مجاش
لمحت بعينى كام منظر
ورا البرواز
وأحلامنا اللى تتحقق
لناس تانية
احنا اللى كان عزمنا
بيحبل الثانية
تولد سعات يتعجن
فيها العرق والكد
نبدرها تطرح بنا
عمر الأمل ما انهد
كنت استمد الشموخ
منك وأنا حابى
يا سمرة فين شمختك
انا لسة بشبابى
شايل فى ايدى القلم
والمطرقة والفاس
ولسة ريحة العرق
بتزاحم الأنفاس
متعرجيش واصلبى
عودك على عودى
أنا لسه لون التراب
مطلى على خدودى
قومى البسي طرحتك
وطرزى الفستان
ازاى جعان يطعمك
أو يسترك عريان
ماتفرقيش شملنا
وتهجرى الأعتاب
دا مكنش من طبعنا
نستعطف الأغراب