نايم ف حضن الزمن
والدنيا لهيانى
والعمر منى إتفرط
وتسفه ٱيامى
وصحيت على دمعتى
بمسحها باكمامى
ٱلقى الزمان إتحدف
بسنينى فوق كتفى
ولما ضهرى إتحنى
قومت ٱسندع بكفى
عشمان يكون الٱجل
فيه عمر قدامى
توب الشباب إبتلى
ومعدش على قدى
بحسب سنين عيشتها
وارفع صباع يدى
على شعر شاب م الزمن
وكرمشة خدى
واقول يادنيا إشمتى
آدى حلمك إتحقق
والعمر ٱجله إنتهى
وجداره متشقق
وٱدى إنتى ويا الزمن
هاتشيلى وتهدى
ٱنا اللى خانى الزمن
وللا إنتى خنتينى
وللا طريق التقى
يحرم على عينى
لما الشيطان وزنى
كنتى إنتى ردينى
سقتينى كاسك وقولت
إن إنتى فاتنة الناس
وروحى ٱهى إتلوثت
من الذنوب ٱجناس
ومشيت ورا لذتك
وتهت عن دينى
بينى وبين التراب
الخطوة وخدانى
وانا اللى طول الزمن
ماقولت آه يانى
وناسى يوم الحساب
وإنى هكون فانى
والعمر بٱزف وخايف
من عذاب الموت
وبٱى حجة هاقابل
صاحب الملكوب
وبٱيه يفيد الندم
ولا فيش رجوع تانى