استعير من المداد الدمع.. حبر اهلّه
لين هذا الشعر يكشف ماصعب تأويله
الكلام اوجاع.. هذا الصمت جمر المله
لاأبتدا ليلي.. لفى هاالهم تدبك خيله
يادروبي.. كلم حلمٍ ماقدرت اوصلّه
ويافضايه.. مابقابك نوض برق اخيله
كني الملقى على رف التناسي.. هل له..
صاحب يداري بكاه ليا شكى يصغيله؟
من وعيت الضايع اللي مالقى من دله
ومن بديت القابع بحزنه ولاله حيله
كل عَقدٍ يتعِب العاقد.. صعيبٍ حله
وكل حمل يهون عن همٍ صَعَب تنزيله
وكل مايل ينعدل نصفه.. وحتى كله
لكن الحظ الردي.. ميله بلاتعديله
واقعي جاير.. ولاادري من أيّة مله؟
ماقدرت استوعبه.. ولامنين اجيله؟
كل ماجا الطين ييبس.. جاه زاده بله
مدري أوقفله مثل ماالند ولااحني له؟
الفرح تعصف به رياح الحزن والذله
اتعجل جيّته.. واصبر على تأجيله
ياحياتي.. ياسؤالٍ عاجز القى حله
هو انا المجهول أو المجهول انا امشيله؟