أبوس إيدك
تسيب حتة نضَر للشوف
تِخَلِّي في الضمير ناحية
تعيش فيها بواقي كسوف
تسيب للمشتاقين نارهم
تسيب للعريانين دارهم
تسيب للجعَّانين لقمة
فياخدوا مِ الشقا تارهم
أبوس إيدك
بربِّ الكرسي والفاتحة
تخَلِّي في الطريق فتحة
تعدّيني
منيش عاوز أعيش ببلاش
ولا أرضى أكون بَكَّاش
ولا عاوز أعيشها.. كاش
يا دوب حتى أعيش تقيسط
وليه بيني وبين الحلم ألف وسيط
أنا أبسط ما تتخيّل
أنا يومي نهار طافح
وليل مِِ الهَدَّة بيليِّل
أنام واحلم بحلم بسيط
لكن في الصبح يتعقّد
ويتنيّل
أبوس إيدك
تسيب أنفاسي مرتاحة
وليه دايما
بالاقي نفسي متشعلق
فِ نخلة هَمّ طرّاحة
ماعدْشي في البدن حتة
مَعَدّتشي على الأوجاع
مفيش شبر ف كرامة وِشِّنا ينفع
عشان يتباع
ولا باعشم
أكون مِِ الحاشية والأتباع
أبوس إيدك
تقول سِر القساوة إيه
أنا سايبك تكون البيه
ولا داخل معاك عركة
أنا عمري يا دوب بالكعب
كام فَرْكَة
ومش هاتشوفني من تاني
هاسيبلك دنيتي خالص
عشان في الأصل سايباني
أنا كل اللي عشمان فيه
يا دوب خطوة
ولا هامشي ف يوم بيها
ف سكة كرسي أو سطوة
أنا جاي للحياة أمضي
شهادة موت
يا ريتك يوم تسيب للخطوة
سكة تفوت
عشان تتفك من قيدك
أبوس إيدك
ولو تسمح لها تتباس
أبوس إيدك
تفك القفل والترباس
وتطلع روحنا واحنا ناس
نروح ع القبر بكرامة
وتفضل حاجة لعيالنا
بترفع راس
ولو ضهر الحظوظ بيهم
يكون محني
يا ريت تشيلني من راسك
وتمسحني
يا ريت حتى ما تلمحني
أكون ميت
يكون أحسن ماكون عايش
وتدبحني
ولو كانت حياتي ذنب
أبوس إيدك... تسامحني
أبوس إيدك
أبوس إيدك