ابن الشحات
يفضل شحات
أما البهوات
طبعا بهوات
وطنك مش ليك
وطنك شبابيك للحرامية
تورك بيدور مية المية
شغال في الساقية الوطنية
تزرع فدادين أحلام بكرة
تطلع أحلامك وهمية
والشمس الطالعة على بلادك
للخلف تشد الجلابية
عمرك منهوش
جسمك مفروش
للرايح... جاي
واقف على جنب بتتفرج
وتقول باي باي
على طول كومبارس على الهامش
لو يوم حبيت تعمل عايش
بتعيش في الدور... عيشة أموات
التعلب فات
خَد دور البيه ابن البهوات
وعشان المشهد يكمل بيك
تفضل شحات... بتمد إيديك
لو واحد منهم عدّى عليك
راح يقفل باب النور ف عنيك
وطنك مش ليك
وطنك مش ليك