ممنوع من صرفي وإعرابي
مبني ع الصمت المتغابي
وحياتي ناقصة ومعتلة
مجزوم.. ب سكوتي باتسَلَّى
على طول في الجملة باكون محذوف
خسران على طول
حركات وحروف
وحمار معطوف
على ألف خروف
والفاعل جابني أكون مفعول
ومَلالي الجملة عليقة وفول
لو بالتنوين مرَّة لمَحْني
على طول الفاعل يدبحني
يعايرني بنقصي ويجرَحني
جبت التنوين من فين
... من مين
إعرابك بس.. تقولِّي آمين
انت المنسوخ واحنا الناسخ
إعرابنا لوحده عليك راسخ
احنا اللي نحدد ونقرر
نحو المفعول كله مقرر
م الجِلْدة تعيشه للجِلدة
وبكَسْرة من تحت الشَّدَّة
عمرك ولا كنت ف يوم منصوب
اعرب مفعولك بالمقلوب
راح تلقى حياتك ولا تسوى
عايش ع اللقمة وع الكسوة
في الجملة مفيش ليك أي حقوق
أما لو كنت ضمير غايب
هاتعيش وتروق
يمكن تترقى وتطلع فوق
تاخد تنوينك ومنابك
واليافطة تنوّر على بابك
بس اوعى تفارق إعرابك
أو تنسى الفاعل.. يوم جابك
بالضمة تعيش أو بالفتحة
لكن.. لو شُفنا عنيك فاتحة
أو حركة مريبة في الجملة
راح تسقط على طول في الإملا
نفتحلك في النحو فضيحة
باعترافات واضحة وصريحة
وشهود شايفين
نسأل من فين
ازاي في الجملة بتغرف غَرف
واحنا جبناك ممنوع مِ الصرف
جاوب "من أين.. لك هذا"
من أين وفين
هذا التنوين