احنا الشعب الطيب
مفِيناش شيء يتعيّب
بِنْغيب أو نتغَيّب
شوف كام دولة أهي دالت
واحنا الطرف التالت
احنا الجهل راكبنا
ومْسيِّر مراكبنا
لمّا الكلمة تجيبنا
ونْحَوّد لو مالت
احنا الطرف
التالت
احنا الجهل مالينا
بِنْْبيع كل ما لينا
ونْعلّق أمالينا
ع اللي ضمايره ماتت
احنا الطرف
التالت
لمّا بْنِلغي دماغنا
في الهايفة اتمرّغنا
للتافهة اتفرّغنا
قالوا وقلنا وقالت
احنا الطرف
التالت
لماّ نغمّي عنينا
أجهلنا يسوق فينا
إيده بْتلعب بينا
حطّت فينا وشالت
احنا الطرف
التالت
اللي يشدّ حباله
نِعْملّ ... اللي فْ باله
فتحوا دماغنا وبالوا
و وراهم ناس بالت
احنا الطرف
التالت
كل ما حَدّ يشاور
من غير ما بْنِتْشاور
نِتْمحور فِ محاور
وحبالهم أهِي طالت
احنا الطرف
التالت
لمّا نْعوم على عومهم
نقتل يومنا فْ يومهم
ونْمُوت علشان دومْهم
وتْضيع أرواح سالت
احنا الطرف
التالت
لما الخوف يِجْمَعْنا
والكدب يلَمّعنا
بِنْمَوّت في المعنى
ونْعيش بلسان فالت
احنا الطرف
التالت
لما نسيب تخاريفنا
فِ بْحورهم تحدفنا
وإيديهم تلقفنا
رسموا وإيدهم نالت
احنا الطرف
التالت
احنا فيران تجاربهم
والمَيّة لْمَرَاكبهم
نقْبَل دوس مراكيبهم
دايسة ولسّة مازالت
احنا الطرف
التالت