أحسن هاشتاج للنبي إنك
تتبع سيرته
تنجد حيران من إيد حيرته
تروي الفدادين العطشانة
ف عنين محتاج
أحسن هاشتاج
تنصر مظلوم
وف وش الظلم تقف وتقوم
وترد الحق لأصحابه
تقفل ع الظالم أبوابه
ما تسيبش بيبان كدب مواربة
اوعاك توافق على باطل
علشان قُربى
وتخاف لايمين
أو تبقى ف يوم صاحب وشين
تسكت ع الشين
وتكون للعيب من أحبابه
أو تقبل حججه وأسبابه
فيها إيه يتمزّع توب باغي
طاب ليه بتجامل وتلاغي
وتعيش مكسوف
وتسيبه بيفرض على عينك
وشه المكشوف
فيها إيه لو ترمي فوق وشه
توب الإحراج
أحسن هاشتاج
تقرا السيرة
وتشوف ازاي النبي وصاك
ترعى الجيرة
وتسير في الناس بأفعالك
أحسن سيرة
وتسيب أخلاق
مليانة نفاق
أخلاق عيرة
اجعل من فعلك قرآنك
فوق راسك تاج
أحسن هاشتاج للنبي إنك
تحسن ظنك
فلا ترمي حمولك على مخلوق
الرزق الواخده بالعافية
هايجيلك ذوق
كل اللي عليك
تهدى وتروق
تحسن
وبسيف الرضا تقتل طمعك
لو موجه اتحرّك فيك أو هاج
أحسن هاشتاج
تعمل ف حسابك للآخرة
الجتة اللي انت بترعاها
وبتجري في الدنيا وراها
جيفة وتراب وعضام ناخرة
والعمر الراكب ع الباخرة
راح يعلى عليه الموت أمواج
أحسن هاشتاج
ترضى بالطيّب من قوتك
اللقمة حلال خدها وسمِّي
لو جاية حرام سيبها تفوتك
لا كتير يحييك
لا قليل هيكون سبب ف موتك
عمرك مكتوب
أجلك محسوب
ولا روح هاتروح للي خلقها
إلا لو كان عمر صاحبها
للموت مطلوب
ولا روح في الدنيا إلا وليها
ساعة ومعراج
أحسن هاشتاج
ترعى ضميرك
وتوسّع في الدنيا لغيرك
تديله نصيبه يعيش إنسان
ولا عمر الدنيا ف يوم تعمر
غير بالإحسان
وساعتها تصلي وتسلم
على أفضل خلق يكون أو كان
على أفضل نبي.. أكمل منهاج
وساعتها تقول
هاعمل هاشتاج