وانت هناك
متوضّي بدمِّك
من شبَّاك الخوف بتطُلّ
احنا هنا راكعين للذل
على رجلين العار بنبوس
احنا هنا مماليك وتيوس
بنتاجر بطاقيّة وسِبحة
وبنكسب ونعد فلوس
وانت هناك... بتخبّي ف دينك
رغم اننا عاملين شايفينك
نايمين وانت مفتّح عينك
عايش وحدك ألف كابوس
احنا هنا دايسين ضمايرنا
والدين فينا كإنّه لغيرنا
غِش ورَشّ علينا ترابه
زيف ع الآخر فاتح بابه
والكداب جايب أحبابه
ونفوس خاينة تشد نفوس
سبنا الدين على باب الجامع
سبنا ضمير يعمل مش سامع
سبنا الحق يعافر وحده
سبنا الصدق بيحفر لحده
سبنا السكة لناس مش هيّا
سبنا العُهر يقول حرية
أما الطهر سجين محبوس
وانت هناك بتقول الله
ماسك دينك رغم الآه
احنا هنا عايشين غيبوبة
نظرة عينّا على السبُّوبة
كاسرين رقبة كل ضعيف
نتخانق على قوت ورغيف
ونبيع بعض عبيد ونخاسة
وطريقنا لو كله نجاسة
راح تلقانا نفوت وندوس
وانت هناك متوضي وطاهر
احنا هنا واقفين نتظاهر
كلمة وصرخة وفض مجالس
وش ملايكة وقلب أبالس
يافطة وبعد ساعات نطويها
بعدها نرجع ونقضِّيها
وحدك تفضل لقمة طرية
بين أنياب تنهش وضروس