أنا... طول عمري يا سْيادنا
فِ دنياكم ضمير غايب
ولا ليّا في شيء نايب
سراب … ومفيش
ومش فارقة فِ تقديركم
يكون ليّا...
ولا فارقة بإنّي مليش
ولو فاضل بقية ضَيّ من بُكرة
على إيدكم تروح ما تجيش
ولو آجي على بالكم...
تبصّولي
فَ من نظرتكم الحارقة
أزوغ واهرب
وأتْخبّى فِ لقمة عيش
أعيش تايه
أعيش حيران
أنا... فِ بحوركم الغرقان
ولا فكّرتوا ويّاكم تعَدّوني
ولمّا شفتوا مركبكم
خلاص غرقت
يا دوب فاكرين تِشِدُّوني
يا دوب دلوقت في الحسبة تِعِدّوني
مَ طول العمر بتعيشوا
حياتكم كلها دوني
وكان كتفي...
بيرفع ليكم البنيان
ولو فكرت أبقى كيان تهدّوني
وكم خبّطت... يا سْيادنا
تردّوني عن الأبواب
أنا لْرجليكم الأعتاب
أنا لْخطوتكم السلّم
أنا... أسفلت سِكّتْكم
أنا... نُكتة حواديتكم
أنا... مدفن نفايتكم
أنا التربة لجتّتْكم
أنا... لا شيء فِ دنيتكم
يا دوب دلوقت فاكرينّي تِشِدّوني
أكون تابع من الأتباع
لإيد من إيد أهون واتباع
وليه لازم أكون تابع
ونَا في الأصل كون نابع
من الإبداع
وربّ الخلق خلّى العقل فيّا أصيل
فَ ليه لازم أكون فِ فصيل
وليه لازم أكون فِ قطيع
وليه عقلي لغيري يبيع
ونَا ليّا عنين للشُّوف
وليه لازم أكون ملفوف على رجلين
تشيل كرسي
وإيه الفايدة مِ الأتباع...
بيمشوا فْ سكّة عمياني
ولا عاقل يقول على فين
تزيد اللمّة
ويزيد العَلَف علفين
وإيه الفايدة لو أرسم
ملامح فوق جدار وشّي
ووِشّ بلادي بين توهة ملامحي ضاع
وإيه الفايدة مِ العلامات
لو الخطوة اللي بِتْوَدّي
على بُكرة طريقها مات
وليه لازم أعيش نُصّين
وتُوب الوِدْن يِتْمَزّع ما بين نَصّين
جسد واحد بيتخانق عليه لِصّين
أنا ليّا الوطن وحدي
وفي الحتة اللي في آخر حدوده
ينتهي حدّي
على حرف الأمل واقف ومتعلّق
ضوافر قلبي بِتْخربش على الأحلام
ومش رِدّة ولا استسلام
بحور الدم تمنعني
أكون عوّام... على عومكم
ولا تفتكروا ده يومكم
لو الراية تكون مرفوعة فوق جهلي
ولا عمري هاكون مكسب
لِحَدّ يحطّ فوق عيني
غشاوة لمّا يندهلي
وإيه أعرف أنا في حكم وسياسة
وطول عمري أنا الممنوع
وألْف ماجور بيتْحَطُّوا على الموضوع
ولو كلمة تكون مِنّي
تصير تُهمة... وحسّاسة
وإيه أعرف أنا في الدين
سوى إنّي أكون طاهر ومطّاهر
وكام برواز لصورة شيخ من الظاهر
وأحكام الجنابة إيه
وإيه المؤذي ونجاسة
وإيه أعرف فِ حكم الشرع
وإيه الأصل في الملّة وإيه الفرع
ومين عرّفني بالدستور
وإيه باين على الصفحة وإيه مستور
وإيه عرّفني أسراركم
ومين عَ العقل أمّرْكم
يا أسيادنا...
أنا لسّة سنة أولى فِ أحلامي
فَ ليه واخْدِينّي ع الحامي
ولمّا بالنهار أفرح
بيطلع ليه على إيدكم
نهار أسود … نهار دامي
يا أسيادنا...
وليه الغِلّ جُوّاكم مالوش هُدنة
عشان أعرف وأتعلّم
وأفتح في اللسان عينه
فَ يعرف سهم كِلماته
لِفِين رايح... فَ يِتكلّم
فلا أتْشدّ مِتْغَمّي
ولا أصبُغ وَ نَا خايف
بألوانكم
عروق دمّي
ولا ييجي عليّ يوم
ويركب حدّ فوق ضهري
أقول... مُضطر...
يا عمّي