كان فاضل إيه غير جدرانك

كان فاضل إيه غير جدرانك

مش فارقة خلاص روح وابنيها

طول عمرك عازل عن غيرك

... قلبك أسمنت

كائن ولا كنت

طول عمر لسانك وكلامه

منقوع في الصمت

دخّلت كلامهم ف ودانك

كان فاضل إيه غير جدرانك

ابنيها وفُضّ

أنت اللي معاك مقاسات الأرض

ابنيها بطول أحزان العِرض

خُد كل حجارة أطفالنا

خُد كل رفات لشهيد كان فات

على سكة روحه للأقصى

كان نفسه يأدّن حرية ويصلّي الفرض

خدهم... اخلطهم على دمّي

ابني الجدران

اعزلني كمان

مش عاوز أشوفك بتبيعني

ابقي اقطعني

حبلك فِ ايديّا بيوجعني

ابني الجدران... طب إيه يعني

طول عمرك واقف ع المسرح

لكن أراجوز

إيد غيرك فيك

والدور مش ليك

رجلين ثابتة

طرطور مهزوز

لو عازوا... تعوز

ويجوز... لا يجوز

ولمين تضحك

أو تلوي البوز

أو امتى تطلّعلي لسانك

كان فاضل إيه غير جدرانك...

على كام تصريح

إن الأبواب من ناحيتنا

جاي منها الريح

مليانة غبار

جاي متحمّل بأنين لجريح

مليان بالدم

وعويل أطفال

ما داقوش م الرضعة

غير الموت

أصوات بتفوت

بِتْطَيّر آخر ورقة توت

ابني الجدران

ادّارى وراها كمان... وكمان

طول عمرك واقف مدّاري

وَرَا سور بيانات

ولا عمرك مرّة بِتِسْتَنْجَى

من كدب وزيف

كل الأوراق المكتوبة

مليانة خريف

تخريف بيلوّن بنيانك

كان فاضل إيه غير جدرانك

كان فاضل إيه غير جدرانك