وتِقفِل عيني شبَّاكْها
يغطيني الضلام... فأنام
قوام أجري على الأحلام
أقول الليلة راح تيجي
وأزرع ورد فِ لساني
عشان يطرح بأحلى كلام
وأسْتنَّى... على ناصية أمل طارح
يسابقني طريق رايح على قدّام
طريق مفروش ب كام يمكن
وكام لسة
تكون بالوقت مش حاسّة؟
ما يمكن تيجي دلوقتي...
وكام مركب قلق يجري
على وقتي
أقول اصبُر
عشان تقْسِم
رغيف الطّلّة ويّاها
تلاقي حاجة شاغلاها
أكيد لسة كعادتها
تروح تسأل عن الأحباب
ويمكن حَد راح زارها
أكيد دارها
كما هوّ... بباب مفتوح
أكيد نفس الكرم فيها
منين ما تروح
ولو تحتاجها... تلقاها
أكيد فيه حاجة شاغلاها
أكيد راح تيجي دلوقتي...
عشان عندي كلام ليها
ومن تاني... أوصِّيها
متنسيشي دوا السُّكَّر
واوعي الدم يتعكّر
عشان ضغطِك يكون مظبوط
وأرمح من سوهاج... أسيوط
عشان علبة علاج ليكي
أشدّ عليكي بالكلمة
عشان برشامة أو لقمة
ودمي... مِ الزعل بيفور
وأغضب لو في يوم تنسِي
كلام دكتور
يوصّيكي على النومة...
على الحركة
وانتي برضه هيّ انتي
بتاخدي الدنيا بالبركة
" يا واد اسكت ما تتعبنيش
هاعيش إنْ ربنا كاتب بإني أعيش
مافيش حاجة بتمنع موت "
وكلمة ف كلمة جُوّايا
خلاص.. الحلم كان بيفوت
وأصرخ.. صرختي ترجع
صَدَى مكبوت
وشوكة يأس بتمزّع
فِ توب الصوت
فأبعتلِك...
جواب من قلبي مستعجل
وأتعلق بحبل الصبر
أقول يمكن جواباتي
فِ يوم توصل
لأهل القبر