مع إن عقلي كان بيلبس مريلة
لكنى كنت أهوى الوقوف
من فوق جبال الأسئلة
أمى وأبويا واخواتى الكبار
كانوا بيرووا عطش السؤال
إجابات عبيطة وعيلة
وكنت آخد مصاصة الإجابات
و... اشتهى غيرها
وف يوم ونا طالع فوق السطوح
شفت أخويا مع بنت الجيران
ف عشة الكتاكيت
بيغازلوا الإجابة العيلة
ويخلعوها المريلة
ويعلموها اللذة فين
أما أخويا التانى
كان بيسرق من الزحام... نفسه
ويدخل العشة...
ويشرب سيجارته اللى مسجونة
وف يوم غافلتهم
ومشيت على همس الخطا
ودخلت أوضة أبويا اللى كان... نايم
ومسكت علبة سجايره وخدت منها اتنين
وطلعت فوق السطوح
ولأول مرة ف حياتى...
أدخل العشة...
ولعت واحدة م السجاير ليا أنا
أما السيجارة التانية... ادتها للكتاكيت