أقول بسم الله قبل رد الأبيات
وقدّام لا تقرأ القصيد العيوووني
والمنتدى ماهو بمركز جوازات
وش عندهم لبطاقتي يطلبوووني
ما فيه داعي مير هيهات هيهات
يا ليتهم في عزلتي يتركوووني
والوضع ما يحتاج كثر احتمالات
أنا الشمااالي كلكم تعرفوووني
شف صورتي وارضٍ لها بي علاقات
يالله سترك قبل لا تنظلوووني
ما ودّي آسجل لنفسي دعايات
لا هو ب من طبعي ولا هى شئوووني
لكن راسي مااْندرق خلف شاشات
خطو الهلايم والضعوف العفوووني
أبين واْرقى فالقذّال الطويلات
مع الحرار ومرهشااات المزوووني
والحمد لله كل اْبوها سهالات
مير إصبرولي وأنصتو وإسمعوووني
الأسم جمهور العصيمي وبالذّات
لا ثارت الهيجا وجنّت جنوووني
ربعي بني عاصم رجال المهمات
ماقولها هقوة ولاهي ظنوووني
تاريخ وموثّق بصولات جولات
من وقت ردّات البرى والديوووني
بالمارتين وبالسيوف الصقيلات
ما هم من اللي بالوطى ينزلوووني
من دون قاصر فالجمال العريبات
من كل شكل وكل صنفٍ ولوووني
قدام يلحقني من الناس شرهات
يومن فالأفكار عالي ودوووني
الهرج قرضة ملح وبليس مامات
لو حانت الفرصة نطح بالقروووني
ما جيت أفاخر بالنسب والعصابات
حبيت أداعب كل من يسألوووني
لكن لي قبل اختتمها طلبات
أمووون مثل اللي عليّه يموووني
اسمي فقط ما بيه لوحه على شات
حتى ولو من شاتهم زوجوووني
لا تحفظون الاسم وسط الملفات
خلوه في قلب الذي مايهوووني
خويي اللي لو تطول المسافات
ينقل حمولٍ وسّمت في متوووني
شرواك يالنايف زبون الونيات
وجبال صمى والحصون الحصوووني
وإن راحت الدعوه معاكس بنيات
أغيّر اسمي لأجل مايزعلوووني
طبع الهواوي لو يسوّي حراكات
واللي على دروب الشقى يفهموووني
في ألف ليلة والقصص والروايات
مرّه مهند واْغلب أحيان طوووني
والمنتدى اللي حط أمامي مطبّات
عيا يطاوع لا ينسّق لحوووني
لولا إن في صدر الشمالي مساحات
كان اْتركه والعارفة يعذروووني