عديت سلم ذكرياتي ولفته
حتى وصلت أرشيف حفظه من الراس
رجم العنى اللي فيه حملي نسفته
فالذكريات اللي على كل قرطاس
ورجعت للماضي بزينه وزفته
محتار جدا واضرب أخماس بسداس
ياما ظلمت القلب ولا نصفته
ما قلت له اصبر ولا قلت لا باس
حتى الدوى اللي من عنادي وصفته
في سجنه اللي من ورى حدب الأقواس
من صيدليات المآسي صرفته
وأسقيته بيمناي كاسٍ ورى كاس
عليه ساعدني غرامٍ غرفته
من كل نبعٍ يروي أثمار يباس
وردٍ ذبل بيدي ووردٍ قطفته
أخرج من الهوجاس وادخل بهوجاس
الشعر من بعد أريش العين عفته
ما عاد اباخذ لي على الخيل مرواس
لو ينعسف قلبي لغيره عسفته
قبل الخسارة والهزيمة والإفلاس
لكن أبوفي في يمينٍ حلفته
لا يتعب الخافق ولا تشره الناس
توبه وهذا الموقف اللي وقفته
حتى أتحاشي سالفة طابخ الفاس
لو كان دمي من وريدي نزفته
رضيت بالعيشة بلا قلب وإحساس