مع حروف الضاد ماسك لي خفارة
وقبل لا أختار اصلي استخارة
واتأمل زين وأطوّل وقوفي
عند تشبيه الجمل والاستعارة
مفرداتٍ من عيون الشعر تصدر
وتنصف المظلوم وترد اعتباره
وترضي أهل النظم والذوق المميز
وبين كل الطرح تأتي فالصدارة
يحتميها شاعرٍ يكتب لذاته
ما كتب شعره على شان التجارة
قدوته نجمٍ ظهر فوق الكواكب
وإن تغير منزله ثابت مداره
فيصلين ريشته وحروف شعره
ترسم الإبداع وتحدد مساره
يُقتدى به فالشموخ وفالتفاني
والحظيظ يصير مثله فالإدارة
نجل حرٍ ما انجبن البيض مثله
لو تكرر حملهن تاره وتاره
كيف ننسى حشرجة صوتٍ وعبرة
ووقفةٍ للقدس وأطفال الحجارة
وبعدما عرجت للماضي ب لفته
عدت للمحور بنقطه واستدارة
المرادف لاسم خالد اسم دايم
ويعطي الفيصل على السيف الإشارة
شع نوره في عسير وعاصمتها
وانتقل شعاعه وعم الوزارة
والوهج في منطقة مكه تزايد
ما انحصر ضوءه على ركون الأمارة
جده غير ومهبط الإسلام مكة
وزهر مصيفنا يجاكر جلناره
وكلما سقت القدم في منطقتنا
عشت حاله من ذهول ومن إثارة
يوم أشوف الهدم في بعض المباني
قلت سرب التايفون وشن غارة
ولا اْنتهى المشروع قلت الله أكبر
أبرز أشكال التطور والحضارة
اشهدوا إني على التاريخ شاهد
والموقر حافظين له وقاره
يكفي إنه ركن للدوله وأهلها
والملك سلمان حطه مستشاره