قرّب عليّ يا شوق مدقوق الألعاس
واسمع خلاصة رغبتي واقتراحي
اما تقدم لي بدله ومحماس
والا اسقني من عيلم الجن راحي
والا ترحل بي على ذات الأكباس
بوينق ماهي من طراز الجماحي
لين اعتلي كور السما وقت الإدماس
عشان ابعّد عن فطوري مراحي
جو المدينة جاب فالصدر لولاس
وعلاجه المقناص وقت السماحي
خذني فديتك يم رُبعٍ بلا أوناس
حتى الذي داخل فؤادي يزاحي
أبعد بخفاقي لهذيك الأطعاس
والا على الديسه وهاك البطاحي
وان شفتني طربان من بعد الأتعاس
والاعب الطاروق يالاح لاحي
هات القلم وافطن لما بين الأقواس
مما يلي والجد عقب المزاحي
الطيب يكرم عن خطا كل بلاس
فازوا به الي ذكرهم فالصحاحي
والي بقى فضلة عراميش ولحاس
ياهني من ياصل لها باجتياحي
ذكر الحيا والطيب يحتاج عساس
فالضيق ماهو فالسعه والبراحي
لاشك ماهو لعب دوري ولا كاس
مقياسه الممنوع والا المباحي
راع النِعِم لو كان حطاب بالفاس
ثابت مهو زبدٍ من الشمس ساحي
واما الردى مستنقع كله خياس
وأهل الردى مثل الصباخ الملاحي
هياكلٍ ومفرغه مثل الأجباس
وأثر عليها عقدة الإنفتاحي
مليت مما شفت قصدير ونحاس
وأيست من وقت به الغبن لاحي
وإذا انقرض في ذا الزمن جل الأشواس
ترى على المرقاب عدى الرباحي
يقوله الي جاس فالأرض ما جاس
يالله طالبك الهدى والصلاحي