ولانك إنت الوحيد اللي بينا اللي سيد
فلازم نؤيد
ما انت الطريق اللي لينا اترسم
وانت النصيب اللي بينا اتقسم
انت الخريطة وانت العلم
انت را عينا واحنا الغنم
وإنت الوحيد اللي بينا اللي سيد
فلازم نؤيد
دايما كلامك رصين محترم
وعاقل وهادي تقولش نغم
ما يقصدش وجهة ولا يروح ل يمّ
ما انت الرزين الحكيم المحيّد
فلازم نؤيد
خطابك مصيري لمسيرة الكفاح
فلازم سعادتك تكون ف انشراح
جميع مملكتنا لخطوك براح
تأسون تشرّم تمطرح تفيّد
فلازم نؤيد
حلولك سريعة ف ربط البطون
لا احنا هانحزن ولا يحزنون
ما انت الشرعة وانت القانون
تشطب بنود ه... تضيف أوتزود
فلازم نؤيد
انت الموفق رؤوسنا ف حبالك
وانت اللي ماسح عقولنا بجمالك
بدأنا صيامنا بطلعة هلالك
تريّل... هانلحس.. تنطق... نردد
فلازم نؤيد
تغضب.. نعلن ما بينّا الحداد
تزعل... يغمر قلوبنا السواد
ولو مرة واحدة نسيت وابتسمت
نرقص عرايا وننزل نعيّد
فلازم نؤيد
رؤية زكية ف أمور الإمارة
خلّتنا ننتج وناخد صدارة
لو خطبة واحدة في قلب الوزارة
نسمعها منّك... نفقس ونولد
فلازم نؤيد
خد من اللي عايزه من غير كسوف
واكتب بنودك واملا الكشوف
مربط وجردل لزوم الخروف
احسب وجمّع وسجّل وقيّد
واحنا نؤيد
لازم نؤيد
لازم نؤيد