هوّ الولد الطاهر
ابن الأرض الطاهرة
مات ف ايديه أحلامه
لو سمعوه... يرفعها
يجعلها أعلامه
تدحرج من إيده
وتفرقع... لو ناموا
تبقى الصحوة الكبرى
كانت الشمس فْ عينه
والصيف من شرايينه
شايل روحه فْ كفُّه
وبلاده على جبينه
حابس روحه فْ موتها
وبلاده تعيش حرة
هوّ الولد الفارس
الفارد في سنينه
راكب خيل أشواقه
يسبقها بحنينه
مادد جسر جراحه
لجل يروح على بكرة
مات من غير ما يعدّي
عمره يا دوب أيامه
عود الخطوة الأخضر
ملفوف على أقدامه
يوم ع الشوك بيدوس
مرة يدوس على جمرة
هوّ الولد العارف
إن الروح بتروح
بياخدها اللي خلقها
في الوقت المسموح
إيه بتكون أوطانه
لو مش لِيه... غير آخرة
مات علشان يتوضّا
من دم الحرية
تبقى صلاته شهادة
تبقى بلاده نبية
يؤمن بيها وتؤمن
إنه شهيد بالفطرة