خالنا العزيز المحترم
من غير يمين
كم احنا بيكم مغرمين
والقلب ليكم.. مال شِماله ع اليمين
بعد التحية والشالوم
كوم من محبة.. فوقه كوم
ولا عدّى جنب القلب يوم
إلا اشتياق عمّال يزيد
مهما يا خالنا تكون بعيد
صورتك بتجري ف دمّنا
ياللي انت ريحة... أُمّنا
والأرض يوم هاتضُمّنا
والحيّ يتلاقى أكيد
الرب يشهد لوعتي
في البعد زادت فزعتي
وازاي باقاسي ف غربتي
من شعب متحَجّر.. عنيد
لكن باطمنكم قوي
الطبخ قربّ يستوي
كل العنيد راح يتلوي
والخطة فايتة في الحديد
عَمّال باجَوّع في ال.. كلاب
ومعايا شاربين العذاب
سدّيت عليهم ألف باب
علشان يعضُّوا فْ بعضهم
ويبيعوا دينهم.. فرضهم
ينسوا شرفهم.. عرضهم
من بعدها...
راح يمنحونا أرضهم
والحال هايتبدّل بحال
وساعتها تتفضّل يا خال
والأرض تبقى عليك حلال
لا مؤاخذة.. كان عندي سؤال
مش ولْد أختك..
برضه ليه نفحة وثواب
مش برضه ليه في التور مناب
مش قصدي أسبق بالشكوك أو بالعتاب
أوعاك.. لا تزعل أو تلوم
أنا لجل خاطرك
عُمْت فوق الدم عوم
ويا ريت رضاكم عننا يفضل... يدوم
بلغ سلامي للحبايب
من قريظة والنضير وقينقاع
إن زرت خيبر
فابقى سلم ع اللي حتى في الرضاع
كل التحية للحبايب ع العموم
خالنا العزيز المحترم
ألفين شالوم
ألفين شالوم