صمت الخروف
والخوف مع الصوف انفتل
والقرون مش نطاحات
القرون الشماعات
لجل تبرير الموات
أو لتقديم أضحيات
الطيبات للمعتدين
والمعتدين للطيبات
واحنا كنا طيبين
طبنا في فرن المحن
نفس السحن
نفس الوشوش
نفس القفا
قمرنا عيش
وباللي زايد م العجين
شكلنا جيش
ودخلنا قلب المعركة
ف ايدينا خيش
ف مسحنا جوخ المعتدي
قلنا له أهلا سيدي
قلنا... كان لازم نقول
مالطبخة طابت للأكول
حبينا...لكن لم نطول
الطول يساوي العرض
من غير ارتفاع
مش فارقة بينا المسألة
ما العرض ضاع
شبع الأسد
واتخانقوا ع الجيفة الضباع
فابقى سلم ع الشرف
حلوة صورتك
وانت حاطط رجل فوق رجل بقرف
وانت قاعد تتفق على دخول المنعطف
حلوة صورتك
لما تمنحهم وطن
كان... واتخطف
فابقى سلم ع الشرف
هاتقابله تاني يا ترى؟
لساك بتهوى الكبر ويا المنظرة؟
وانت قاعد في الصفوف اللي ورا
علشان تنام...
تصحى... ف تفتح منضرة
تقبل عزا
م اللي غزا
في عز نومك...فزعك
دبحك خروف... ومزعك
وزعك
دمك... حنة للكفوف
واللحم... ف اطباق الضيوف
والصوف... يخلوه مشايات
أو دواسات على كل باب
والعضم... يرموه للكلاب
أما قرونك... شماعات
تفتح دولابك كل يوم... تلبس ممات
كل الساعات متظبطة...
ع الوقت فات
الوقت فات
الوقت فات