فتح المزاد
مين يشتري هذا الوطن
كدة باللي فيه
وطن بديع
فيه الرضيع
ممكن يبيع
حتى أبوه
في المهد ناطق باعلى صوت
مين يشتري هذا الوطن
في البيعة نيل
هادي... جميل
على حجره نايم شعب
لكن نوم ذليل
ميت ومحتاج للكفن
مين يشتري هذا الوطن
بالقسط... كاش
متر الوطن
أرخص من المتر القماش
والدفع آجل أو بلاش
حمل وقبضني التمن
مين يشتري هذا الوطن
ع البيعة تاخد أهرامات
فرعونها كان فرعون ومات
لكنه ساب الفرعنة
كاتمة نفسنا بجدعنة
صلاحية ميت مليون سنة
وصلابة تتحدى الزمن
مين يشتري هذا الوطن
معانا شيلة تضحيات
وطنية فينا الأغنيات
تتغنى لو تعلبنا فات
دم الشهيد من غير تمن
مين يشتري هذا الوطن
مين يشتري السد المنيع
للبيع كمان متحف بديع
المترو بالركاب
ومعاهم نفق
مين يشتري طلة الشمس ف بلدنا
والشفق
ع البيعة شعب كان فصيح
عربي صريح
لكنه من همه رطن
مين يشتري هذا الوطن
مين يشتري هذا الوطن