كل ماهبت ذعاذيع النسيم
واستثار الفكر حلمٍ ودعه
ذكرتني لوعة العشق اليتيم
نظرة الطرف الحزين ومدمعه
في زمانٍ مانفع صبر الحليم
لو ترجى من زمانه منفعه
مايمد الوقت مدات الكريم
الكرم ماهو على موت اربعه
قلب عاشق والمحبه والنديم
وحظ وافي ماشقى من هو معه
ياشتاتي من شتاتٍ بي مقيم
كيف اشتت من شتاتي يجمعه
ونتي منزالها وسط الصميم
مايترجم حزنها من يسمعه
لك ثلاث سنين يالجرح العظيم
وانت تنزف من طعونٍ موجعه
لو جديدك ماربطني بالقديم
ماشكيت وقلت تكفى من سعه