عديت في رجمٍ عسيره مراقيه
في مهمهٍ قفرٍ به الذيب عاوى
ماطبه اللي يخلفنّه هقاويه
ماطبه الا مخلفين الهقاوي
ماكل قرمٍ يوصلنّه خطاويه
قوّ الصمايل يدفعن الخطاوي
من ضيقة اللي مدلهمه لياليه
عنّا القدم في راس رجمٍ خلاوي
قام يتوجد من عنا حر مافيه
قلبه طواه من الصواديف طاوي
عزاه يوم انّه على المر حاديه
غدر الزمان وجايرات البلاوي
ياصاح لاتلحق عذابي مشاريه
درب الهوى يصعب على كل قاوي
كني صويبٍ مالقى من يداويه
جر الونين وخالفته الرجاوي
كله سبايب من جفاني وانا ارجيه
بعد الله اللي عالمٍ بالشكاوي
غروٍ وصوفه كامله يوم احليه
عنق المها وعيون حرٍ نداوي
رعبوب غضٍ ترف سبحان باريه
ممشوق طول وبرق خده سناوي
والخشم سيفٍ سله القرم بيديه
من فوق شقراً ماتجي بالمناوي
والشعر ليلٍ منسدل بين كتفيه
اسود كما ذيل العبيه رهاوي
الموت مشي صويحبي يوم اناديه
يقبل مقابيل السعد للشقاوي
غيره يابو سلطان لو حل مابيه
ماهز قلبي لابسات الغطاوي