بحبك ايه

بحبك ايه؟!!

دي كلمة بسيطة ما تعبرش عن قلبي.. ولا اللي فيه

بحبك ليه؟

ولا عارف جواب يشفي.. واجاوب ليه؟

انا نفسي ما نيش عارف..

ولا شايف سبب واضح يخليني أفكر فيه

دا مش شغلي.. ولا دخلي

ولا عمري اتحشر في اللي ماهوش أمري

ولا اتحاسب في مرة عليه

انا ماليش في حبك ذنب.. والله

دي حاجة مقدرة في الغيب..

واكبر عيب.. وذنب رهيب..

لو اسأل.. واعترض.. وأخيب

واقولك ليه؟..

بحبك ليه؟

اذا كنت بصحيح يعني انا الفاعل.. ومش عارف

ولا عاوز في يوم حاسد

ولا منجم.. ولا حاقد

ولا مفسر ولا ناقد.. يقول لي ليه؟

لو انت بجد مش عارفة بحبك ليه؟

فقلبي اكيد.. مداري السر ومخبيه

وايه دخلي

دا مش شغل

ولا عمري اتحشر في اللي ماهوش امري

ولا اتحاسب في مرة عليه

بحبك ايه؟!!

دي كلمة بسيطة ما تعبرش عن قلبي ولا اللي فيه

ما تسألنيش بحبك ليه؟