حشمتك ادري بكيفي ولاني فيك مجبوره
اذا اني قلتها احبك تراني اسحب اقوالي
من الساعة تِجردتك وهاذي قمة الثوره
بعد ما زِحت اوصالك تحمل فيض زلزالي
انا من حبكة الدنيا مزيج العز من نوره
انا يا سيد الكذبه نسفتك بينها اوصالي
ولا همني ادمرني وانا في العشق معذوره
وكيف يهمني منهو يِعره حُب أمثالي
مثال العز يا هذا في قلبي،، عايش دوره
حسافة يوم بديتك على نفسي على حالي
تخيلتك زِمَن فارس،، بيثني امن زمن جوره
حسافة اني تخيلتك للحظة والد اعيالي
خسارة كم رخصت الحب وروح الحب مهدوره
عشان الود من باعه يِرخص كل شي غالي
ولاظن لك بها مسكن وكلٍ يسرق ابدوره
ثمارٍ لك تبينها،، تأرجحها،، على احبالي
كذا يا قلب هالدنيا تغرك ياهي مسحوره
تِقَيّد كل من يعبر بلا قيدٍ وأغلالي
بعضهم يعشق المولى،، يعيش بحد مقدروه
ولا عمره طمح لأكثر رضا من ربنا العالي
وبعضٍ مثلك اغرتهم ملامح عشق مكسوره
جبرها الشهد مِتعري،، مذاقه حامضٍ حالي
تذوق من حرامٍ له طلبتهناشد اعبوره
عبرت وضلت اقدامك بليلن معتمٍ خالي
وانا في النور راح ابقى رموز الود معموره
اعيش الوقت ما آبه سوى بأحلام تِصفالي
عسى الي غرته دنيا وعاش ايوزه اغروره
يذوق الي تذوقته،، وهاذي آخر آمالي
مثل ما هِنتني اشرب،، صنوف الغم مسعوره
واذا انك شفتني خبله؟ بعد ما ذقته اخبالي
ترى المشوار بالأول بعد ما فاض عن طوره
ولا جاك بخطا حَره، وموجِ الوعد متعالي
ويغمس كل اركانك بِيَم النار مغموره
يبيحك لجل ما يثأر،، وتركع عند اطلالي
حشمتك ادري بكيفي ولاني فيك مجبوره
اذا اني قلتها احبك تراني اسحب اقوالي