عاوزين ولد
مرسوم على دراعه أسد
منقوش على جبينه تضاريس البلد
حافظ معالم حسنها
عايش لها وبيها
ومنها وفيها مادد ألف جدر وجدر
راضع من عروق الأرض سر الجدعنة
وف حبها فارد قلوع الفتونة
يفرق ما بين هزار وجد
عاوزين ولد
في عروقه يجري دمنا
يتعب ويعرق زينا
في الصبح نلقاه وسطنا
ياكل معانا اللقمة بالملح اللي جاي من كدنا
في الليل.. ننام
يسهر ويحرس حلمنا
من شر حاسدٍ حسد
عاوزين ولد مصري بحق
تفرك جبينه ينعقد مسك العرق
معجون بحنة ارضنا
وف لونه سابت شمسنا عنوانها ساعة ما انفرد
واتمد زي النيل.. فرد..
.. جسمه النحيل بعد الضنا..
... على سطح دار
في ضل توتة معرشة جنب المدار
بين الغيطان
والنسمة بنوتة بتفرد شعرها
وترش بالعطر المكان
فارتاح ونام.. نوم العوافي.. واتولد بعد الأدان
مشحون بقوة حب فوق الميت حصان
وعزيمة ما تعرفش حد
عاوزين ولد
مش عبد مال.. ولا عبد جاه
معجون بطيبة شعبنا.. يخشى الإله
ويشيل على كتافه همومنا كلنا.. وما يقولش آه
شايف حدود الحلم..
.. عارف مبتداه.. ومنتهاه
راسم خطاوي دربنا..
... واحنا وراه ضهر وسند
عاوزين ولد
يعشقنا ونحبه
رافع جبينه لفوق.. ما يخفضهوش لغير ربه
عاوزين ولد حبّيب
عاشق رهيب
يعشق ترابنا ورملنا
يعشق عددنا كلنا.. ويحطنا ف قلبه
عاوزين ولد
لو قال مدد
يلقانا خير الجند جنبه بدون عدد
فرسان لا نعرف أمركان ولا روس ولا ألمان
ولا نخاف من أحد
لو خاض بحار الأرض خضناها وراه
وكلمته في الحق سيف بتار ما يعرفشي مرد
عاوزين ولد محترم... فارس نبيل ونزيه
راجل في هيبته هرم... يقرا الوشوش بعنيه
في السلم خيمة وعلم... ويعادي من يعاديه
مهيوب ما بين الأمم... ويحطنا في عنيه
عاوزين ولد
مرسوم على دراعه أسد
يعشق تراب هذا البلد
يا هل ترى نلاقيه؟؟