الناس حالتها في البلد متنكدة
عاجبك كده؟!
واحنا اللي ياما حلمنا بيك
بس بصراحة الحلم ما كانشي كده
الحلم كان
نكسر جدار الصمت والخوف والقلق
ونجيب نهار.. عز وفخار
من فرحته
يطرح سنابل فرحة للطفل اللي بكرة في بطن أمه هيتخلق
ترجع شموسنا بعزنا... تفرش دفاها يضمنا لآخر مدى
عاجبك كده؟!
صمتك وخوفك زودوا فينا القلق
والطفل جاع في بطن أمه.. واتلزق
مش راضي ينزل.. يتزنق
ويعيش حياة بالشكل ده
اللقمة فيها بالعدد
والنيل نشف.. محتاج مدد
وف كل يوم غم ونكد
وهموم كتير.. والحارة سد
إيه اللي وصلنا لكده؟؟؟
عاجبك كده؟؟؟
يا تكون أمين على حلمنا
عارف طريق الفجر.. حاسب خطونا
فاكر ملامح صبيحنا الحلو اللي تاه
راسم مطالع شمسنا.. ونورها.. ومداه
يا تسيب مكانك للي عارف قصدنا
وتفضنا م الدروشة... والحنكشة
الناس ما هيش عاوزة كده
والحالة جيم.. ومنكدة
عاجبك كده؟!