تطيب النفس وجروح الحبيب بصاحبه ما تطيب
ويمسح ذكرياته بس جرحه وين مسّاحه
علامك والله إن اللي تسوي في حبيبك عيب
اجل من والف عيونك تفارق نفسه الراحة
على كثر ما يملى كفوفه لك وصال وطيب
وعلى كثر ما أختار الفرح لك وأهمل أفراحه
ضميرك ضمير إرهاب وإلاَ يقتلك تأنيب
وترى بعض الخطايا مالها قلوب دمَاحه
أمنك فكل ما يملك لكنك صرت مثل الذيب
عدى فالليل لشياه الكريم وعاث في مراحه
ولقى نفسه ما يقري ضيف بيته غير بالترحيب
منعه الذيب من جوده ونوايا الذيب سفَاحه
خدعته مستغل إنه بشر ما يعلم بسر الغيب
خذيته من دياره والفرح وأهديته أتراحه
لأن الشمس طلت من جبينك واحلفت ما تغيب
تحايلت بعطا ربي عليه وسلَم سلاحه
عقب ما كان يطمح في اقتحام أسوار تل أبيب
تعرض للكسر في أول معارك عين ذبَاحه
دخلت الحمى القفر النزيه بكامل التهذيب
بعد عهد ومواثيقٍ غلاظ أعطاك مفتاحه
وجرحته جرح عدوان البشر ما هو بجرح صحيب
مواري قساوة جرحك الصعب فضَاحه
أنا آسف لزوم إني عن القصة أزيل الريب
وعن العاشق اللي نوب تبكيه نواحَه
أنا ذاك الحبيب اللي تلون عارضه بالشيب
وأنا ذاك الحبيب اللي يسولف بك لمسباحه
وأنا ذاك الحبيب اللي تذاكر رحلته في الجيب
مغادر وطنك يجر خلفه شنطة اجراحه