أبكيني أن صاح صيّاح الوفاه الحزين
وحطي على جنازتي قبله ودمع وزهر
قبلي توفى نبي المسلمين الأمين
وش عاد وأنا جسد من هم قلب وسهر
أعطيتك اللي مضى لي من شحاح السنين
يومني أقول أبدفع كل عمري مهر
وش فيك يا المترفة ما كنتي تصدقين
يوم أخبرك سر قبل أقول سري جهر
على ضفاف النهر عشتي زمن تضحكين
عشتي زمنك الفتي ما بين روض ونهر
أي والله إنك أخذتي سجة السائحين
على شواطئ نهر كله طهور وطهر
أمضيت عمري وفي يا صدّت الناكرين
شوفي بقاياك في قلبي سنين ودهر
أبي سألك كان ما كنتي من الجاحدين
أنتي قضيتي سنه وإلا قضيتي شهر
أوقاتك الليل وأنتي دائما تسهرين
لا تسألين الضياء صباح وإلا ظهر
ترا المعاند ببعض الأصدقاء الماكرين
يرقى يسمى من الأخلاق بئس وعهر
إن الله أعطاك عمر وصحه بتذكرين
وبيذوق قلبك من الحسرات هم وقهر
ويا حُرقة الجوف خفّي تعبوا الصابرين
اللي صهرهم من الدنيا لهيبك صهر