مليت في موضوعك اعيد وازيد
اربع شهور وفي جفاك متردد
حط الوفاء لأيامنا البيض لي قيد
وصبرت وانته بالمفارق تهدد
ومادام جاي الحين جائب لي العيد
ماني بخبلٍ عقب ذي يتودد
روّح وتاسعك الفيافي من البيد
ابوك أنا خطو الشجاع المردد
قد قلت لك كافي غرورك ولا تزيد
مليت اسير بدرب ما هو محدد
البس لك الفاخر واطارد لك الصيد
وتلبس لي من الجور ثوبٍ مقدد
اجي واسابق من غلاك المواعيد
وسحاب وصلك من سماي يتبدد
وحكاية اني أعشقك مثل ما تريد
قررت ما سمعها قرار يتجدد
ميزتك زين وواجد الزين في الغيد
نلقى مع الترفات زينٍ معدد
وهديتك مني ماهي عقد للجيد
فاتورةٍ بتموت فيها تسدد