ابتعدي بقد ما يطري علي الغياب
اللي ينشط بذكرى حبك الذاكرة
أمليني اشعور عطشانٍ يطارد سراب
وامليني إحساس وافي والبشر ناكره
لا صار تنبت بذور الحب فوق التراب
تلهج بذكر الحيا اقلوبنا الشاكرة
ما وسوس إبليس إلا في عقول الشباب
ولا شوّه الحب غير العالم الماكرة
يا قبلة الزين ويح العمر ويح الحجاب
وشلون غطى صباحات البها الباكرة
في العقد الأول وفي سنين المطر والضباب
وش دار في أيامنا؟ يا هل ترى فاكره
كنتي بذاك الزمان أوطان مدري اغتراب
الوجهة اللي خذت مغليك من ماكره
تسوقني لأرضك النسمة واحس العذاب
لجيت في روضتك ورياحها ساكره
حسبت ليامك المدة وحسب الحساب
فاتت بواكر ثمر كنت أنوي اباكره
انجومنا دام راحت بين شهب وشهاب
ما عاد باقي لنا درسٍ نبي نذاكره