قالو ورى ما جيت يوم ابتدئ العيد
قلت اتركوني لا تزيدون همي
ما بي على نفسي تزيد ملاهيد
عيدي فقط قبلة على مفرق أمي
من بعدها لا تنشدوني وش أريد
إلا إنكم تحيون أبويه وعمي
ويا الصرخة العظمى تعالي تناهيد
الموت ينتظرك على اطراف فمي
لشاهدت عيني رسوم الأجاويد
نزلتها من موق عيني لكمي
فاقد لي رجالٍ فخلوني بعيد
لا تذرف عيوني من الحزن دمي
الأول اللي ما طمع فيه أبو زيد
عودٍ ترك لي مجد كبّر معمي
أعيش في حزني ثلاثين وتزيد
رغم إن ثلث القرن عدا وتمي
والثاني اللي ما فعل شيءٍ زهيد
أمر بيته نظرتي كاس سمي
وينه زبون المصلحات المفاريد
اللي لخطّاره عليها يسمي
أثنين ما جابن لهم ثالث الغيد
من طيبهم كلٍ عليهم يسمي
عيال عود عاش يوم المعاويد
عيشة فخر ماهي بعيشة مذمي
ويا ناس عن جمعاتكم بضرب البيد
ما هو بكره إلا من أسباب غمي
لو مرّ عيد وعيد دهر وتراديد
ماني بيم أحدٍ ولاحدٍ بيمي
ومن عاد يسألني أبا أعيد وأزيد
لولاي أخاف أعق ما رحت لأمي