الصبح هادئ والفضاء للعصافير
وحكاية الطقس الصباحي حكاية
مدري صباح الورد وإلا النواوير
مدري هوى هاذيك وإلا هواية
بس الوكاد اليوم في بدايته غير
وباب السعد يفتح على كل غايه
وقررت اولع في كفوف الجماهير
باللي من الإلهام تملأ سمايه
تليق فيّ وفي عنود الغنادير
اللي تفيض عيونها من غلايه
صباح ربي في تقاسيمها الخير
اللي تمثل عن ضياعي وقايه
تعالي أنحر لك ارقاب المعاذير
وتعالي امنح شوق قلبك هدايه
من وين ما سرتي أنا لازم أتسير
سيري وأنا بينك وبين العباية
يا أحلى صدف عمري ويا أجمل مقادير
يا حساسي الباذخ وصوتي وصدايه
والله لو سارت لمثلك مداوير
ما عينوا مثلك شبه يا منايه
طيري من النشوة وأنا مثلك أطير
ونرسم قلوب العشق على المرايه
لا تكترث باللي يبا يكون ويصير
دامك محرم ما تغادر سمايه
حظي تعودته صبيّ المخاسير
إلا معك حوّل بتاجٍ وراية
هم يحسدوني فيك من حبنا صغير
من أول الخطوات فأجمل بداية
وتركت لوم الحسد وسط الدواوير
وجيتك وخليت الحسد من ورايه