يمه وأنا لا قلت يمه تذكرت
اسنيني الأولى وفرت شبابي
وعادت بي الذكرى عقود وتصورت
حملي وميلادي وماي وزهابي
يمه احس اني مقصر لفكرت
وش كثر عانيتي بسوقك ركابي
ياما تبعتيني ليا اقبلت وادبرت
وياما حسبتي من طعامك حسابي
تقفين ليل البرد مادام ما ثرت
وتقفين حر الشمس لين الغيابي
تتبعني عيونك فرح كل ما سرت
وبيديك يا يمه نسجتي ثيابي
وليا تعبت أو لا زعلت وتكدرت
تضيق بك دنياك من حر ما بي
من صغر كنتي لي ليا حد ماصرت
رجال بسنيني وطالت حرابي
يمه بعد ما شبت كني تبصرت
وجولي عيال وراح وقت الشبابي
تكفين دوك العذر عاني تعذرت
عن كل تقصيري يجيلك جوابي
وعن ما بدر مني وجاهرت وأسررت
وعن غفلتي وعن شقوتي وعن غيابي