عز الله إن الخاطر إن طاب ما طاب

عز الله إن الخاطر إن طاب ما طاب

وإن عاف عشره ما رجع عن عيافه

وليا أجرحوه اللي على قلبه اقراب

جرحه ما هو جرحٍ تضمه لفافه

يا هشام يا ذيب الخلاء عرب الأنساب

يا آمال ابوك وشبعته عن كفافه

يا راس مالي يا ذراعي ليا شاب

راس تعّود للفخر والأنافة

الله يفتح لك على الخير الأسباب

وياقاك من همّ الزمن وانحرافه

اقرا بوجهك شي يملاني إعجاب

وينسيني الآم الزمان وجفافه

يا هشام عن ريح الوذى سكر الباب

ولا تفتحه لو كان قلبك خلافه

وترى الردي لو طبت له منك ما هاب

الطيب مع بعض الوجيه الصلافة

بعض الرجال يصير للطيب طلاّب

وبعض الرجال يفضلون السخافة

واحيان صدقانك من الناس الأجناب

سبق بها (مفضّي) بعقله وقافه

وش باقيا يا وقت غالب وغلاب

رحت وتركت بجوف صدري حسافه