قومي اعرضي يا فريدة طاغيات القصيد
قدام ربعي هل الطالات وارجالها
تبختري مثل ربعي في النهار الشديد
وتفاخري مثل فخر مطير في عيالها
اسوق لجلك حروف الضاد مثل العبيد
واسقيك من راهية واقف على جالها
وان ما رويتي من الأمجاد عندي مزيد
امطير ربعي ما نقدر نحصي أفعالها
امطير لو تنطق البيداء وخضر الجريد
عدت لنا بالمفاخر سيرت أجيالها
ما يحصي أفعالهم بحر الرجز والمديد
واشمل جميع الكتب والناس واقوالها
الأرض تحفظ لهم تاريخ راسخ واكيد
والهم من المعجزات النّدر اثقالها
امطير يعرف لها في نجد ساسٍ جويد
اشهر بنجد العذية منك يا جبالها
والفخر في لابتي مطغي وعقلي رشيد
لا تمنعون السيوف تعانق إسلالها
ماحط للسيف سمعه غير حد حديد
ولا حط للمعركة هيبه سوى أبطالها
ومن يحمل السيف يعرض به مثل ما يريد
ومن يشعفه طاري الأمجاد غنا لها
مطير حاضر فخر ومطير ماضي مجيد
تشهد لها أيام دنيا الناس وليالها
يضاف للماضي الناصع بياض جديد
ودنيا البشر دايم وحنا على بالها
فعائلٍ نادره تفعل وذكرٍ حميد
اتشرف اسمى القصائد واسم من قالها
وشيوخنا شالوا الشيخة بعزمٍ عتيد
ما فيه شيخٍ هزع متنه ولا شالها
ويا مطير فخري مع الشريان قبل الوريد
يا أمان راسي بدنيا الناس وأهوالها
وليا اعرضت في غلا ربعي فريدة قصيد
تلعب على كيفها وتمشي على فالها