زعلّني الشوق يومنه طواني طوي
وأقسمت للشوق لفنى ما انكسر راسي
والشوق لو كان قاسي ما يهز بدوي
لو كنت في عمق شوقي ما ضعف باسي
مشكلته إنه نسى إني في صدودي قوي
وأنا من الله خلقني ما أرحم الناسي
صحيح قلبي خضر لكن عقلي سوي
وحنون في موعدي وفي غيبتي قاسي
ما يقترف قلبي الأشواق لين يغوي
وليا اقترف ما اشتهى وش ذنب حراسي
ولا صار لمعتّق الذكرى بقلبي دوي
حطيت حبة تعزم النوم في كاسي
كلش ولا الشوق ما يركب يميني خوي
لا صار وضع الوفاء والصد متواسي
ولو ذاب قلبي صبابة في جمال أنثوي
تبقى الأنافة أعز الورث من ناسي
يا سيدة ما مضى لي في الصلابة ذوي
لو هام قلبي بكونك عزّي أساسي
كويتني في ركن صدري بصدك كوي
تجهزي للقصاص اغتاظت أقواسي
أتذكرين اللقاء ليل الذياب تعوي
أتذكرين العطاء والحب وإحساسي
أبكي على الشجرة اللي غصنها مرتوي
وقولي زرعها وتركها وفي وجه فاسي
وقومي وهاتي من الصندوق ما يحتوي
وذريّه وقت الغروب بشاطئ اوناسي
والحب لو كان يزويني بشرعه زوي
وأحتاجه أكثر ماني محتاج لا أنفاسي
صيور تلوي سنين العمر عنقه لوي
وامضي ولو ما نسيت بثوب متناسيِ