حبيبي والمساء عمري وحلمي نجمه الهاوي
وبقايا جذوة الصبر العظيم تموت فيديني
امانه كان ميزان الوصل والهجر متساوي
تريث لين يشبعك النظر وتفيض من عيني
وتجمل يا عتيق الود دامك للهجر ناوي
تجمل فا آخر اللحظة بطيبٍ بينك وبيني
يا مقدم من رعى قفر الخفوق وعشبه الذاوي
يا أول من زرع حبه على ساقي شراييني
يا شرح الحسن بلحون القصيد وسمرة الراوي
يا واقع من خيالٍ كل لمحه فيه تغريني
تخيل عقب ما ترحل مكانك خاليا خاوي
من اللي عقب ما ترحل بينزل به ويرضيني
لك الطيف الحشيم اللي يجيني فالمساء ضاوي
وأقلط له صواني من سهر عينٍ معنيني
وأنا في داخلي جرح كبير ولا له مداوي
بيبقى في غيابك ما بقت لي باقي سنيني