يا جارة الفكر فالليل الطويل العتيم
اسري وخليني أغفي لين يبدا الصباح
حكايتي مستحيل تكون ليل بهيم
حملتها للغلاء من فوق صدري وشاح
أنتي كيان متفرد ما أنتمى للحريم
عطر ان حفظته واذا رشيت عطر وفاح
قرار حبك صعب مثلك بجنسك عديم
اختاره العقل للخافق وعقب استراح
ودورت فتوى تجيز لقلبي انه يهيم
في امهات الكتب وبطون كتب الصحاح
لين ان حصلت فتوى قيس قيس القديم
يقول عشقه لليلى في اجتهاده مباح
وعشقت لجلك مدن ومحافظات القصيم
وعشقت لجلك سهوم الوجد واقوى الجراح
يا جارة الفكر لا يشمت بجرحي لئيم
دخيلك تضمدي جرحي عن الانفتاح
ادرى قرار الفراق احباط ما هو سليم
وفراقنا جاء لغة ما جاء فراق اصطلاح
يا أرق وانعم من الوردة وروح النسيم
يا ملفته والله ان الصبر ولاّ وباح
خافي من الله ليا مني وصلت الحطيم
ارفع يدين الدعاء وافجر عيون السماح