هتّان ها الليلة الإحساس ما هو بخيل
من عصر يمطر بحروة عطر ليلك يمر
تذوق الحب يا طرف الحنان الكحيل
في ليلة النور من لحظة طلوع القمر
وجود الأحزان في ليل الغلاء مستحيل
مادام ها الليلة أغلى ليلةٍ في العمر
شف غصن ليلك بدا يثقل شوي ويميل
خله يبي يطيح لجادت نوايا السمر
والهمس من طرفك بقلبي يحط ويشيل
يشيل برد الشتاء ويحط نار وجمر
تعال على ثرا صدري وهات الجديل
وعطني من الحانة الحمراء رشوف الخمر
مادام ها الليلة الدنيا هواها عليل
والضوء من خلف شباك الأماني حمر
قلبي عقب شوقه المبطي يبيله غسيل
والنفس تبغى عقب طول الصيام الثمر
لا ترحم القلب من حملٍ تشوفه ثقيل
أسمر على صدرك الفتان قلبي سمر
أفعل بي السحر وش باقي برجل نحيل
وأغمرني ببحر شوقك يا حبيبي غمر
وبشعلك الشعر وولّع بقلبه فتيل
واصب لك من فناجيله وتقدع تمر
جميل بعض الزمن فعلا مروره جميل
لجاب مثلك وليل العشق زان وعمر