حبيبتي مغرومه بذكر الأبطال
واتعرف فرسان العرب والجزيرة
موسوعة أحداث وتواريخ وأمثال
وقصص مواقيف الرجال الكبيرة
تعشق قيم ما تعشق ألوان وأشكال
مع إنها ف أول صباها صغيره
لازال حلم سنينها شوف خيّال
لسلّ سيفه من ضمادة جفيره
تبني آمانيها على نافل أجيال
وتحس صارت في حماه الأميرة
سمّتني بجوالها ب اسم مثّال
وتقول يا راع السيوف الخطيرة
وجهٍ حلو ومزينه حبة الخال
في خدةٍ مثل الضياء مستديره
وابوي يا منظر أديمه ليا شال
اللثمة اللي فوق شمسٍ منيره
ليا طربت تسمع من الشعر موال
وتعوم في قاع البحور الغزيرة
آخر خبر جاني عن مجدّله طال
من صاحبٍ له دائما يستشيره
يا نوت ما حبّك سوى فارق ارجال
لو ما حصل له يرتكي للمغيره
رجّال عوده في ثراء المرجلة طال
له سيرة فالطيب ماهي قصيره
قمة جبل متسلسله وصل ف جبال
باذخ شرف ما هو بخاطي فقيره
أخذيني اللي يعدل الوضع ل مال
واخذيني اللي ما يضايق قصيره
واخذيني الأمان في وقت الاهوال
اللي معه تمسي عيونك قريره
اواخذيني السيل الربيعي ليا سال
اللي يدور الحول يطرخ غديره
واخذيني النحّار في قلّ الأموال
واخذيني الطاهر بيان وسريره
واخذيني العاشق ليا ظلنا مال
اللي ما يغدر ف الليالي عشيره
بس أنتي ارضيني ترا العرق ميّال
لي لابه وربعٍ ودار وديره
سميني الهارف ترى الاسم لازال
القدوة اللي نقتدي في مسيره