عطيني الحب وأخذي كل ما ودّك
لومك على اللي يشح بشي عن خلّه
وأرميني بوجه من وقّف حسد ضدّك
روحي سياجك وسيفي دونك اسلّه
لو ما انتهى درب خطواتي على حدّك
لعنت دربٍ مشيته وآخره ذلّه
يا معتّق العود قلّي وش عمل ندّك
هبت به الريح واجتاحت به التله
وفجّرت في داخلي عينٍ مثل خدّك
وصبيت لي قهوة هيامك من الدلّه
لجيت اعاتب عيونك ينثني قدّك
غصنٍ ثناه الثمر في وقته وحلّه
وانا افهم العين لو ما بينت سدّك
إني المفدى غلا في عالمك كلّه
قومي أوقفي وسط عيني منهو يردّك
وتمرجحي فالهدب وارتاحي بضلّه
عيني تكحلّك شوف وقلبي يودّك
يا روض عمري ويشمومه ويافُلّه
بتقول لي يا عيون الريم من جدّك
وبقولك من منابر قلبي ايو الله