يا سائلي لو قلت ما بي وعللّت
وشلون تفرق غفوتي عن سهادي
تلقى جوابي لو بشعري تأملّت
عن سالفة زرع الشعور وحصادي
نوبٍ أقول إني عن الشعر بطلّت
ونوب اتحداني للقصيد الحوادي
وش كثر من رِق المشاعر تبهذلّت
إلين صرت مع الجمال انقيادي
لمحة نظر عن وقعها ما تخيلّت
لشفت لي مخلوق ما هو بعادي
أوقفت شعري للجمال وتجملّت
في كل ديرة من نواحي بلادي
ولو القدر في حكمة الخلق عدلّت
عشق الجمال ولو وقفلي ينادي
قبل امس شفت الريم حولي وهللّت
ولبستها عقدٍ الشعر من فوادي
سحابةٍ راحت بعد ما تبللّت
واكتظ في صدري من الشعر وادي
تشبثت فيها عيوني ولا طلّت
منها ولو حلمٍ يجي في رقادي
يا ليني يوم اعجبتني تغلغلّت
وطوقت عنق المترفة بالأيادي
ياما كتبت بعابرة درب وأكملت
دربي وحنطت القصيد ومرادي