قم ألحق النور قبل الليل ما يليّل
الوقت محسوب والأعمار محسوبه
يا مشرق النور لونك كحل ومخيّل
بديت في صورةٍ في نسجها أعجوبة
يا هل تُرى لو يصب الضوء ويسيّل
وشلون أبي اقنع بها ما تحسب أكذوبه
والساري اللي عقب ما ليّلت ميّل
نام وسرق مزهبه حنشل وهجوبه
وأصبح يمد النظر في عالي طويّل
يمدّ حبل النظر والنفس مكروبه
في وقتٍ يخلي اللي واجد قليّل
يذكر عن مطير وش سووا بمشذوبه
وليا تعب مجهد الأقدام ثم قيّل
يموت في ظل شجرة والكفن ثوبه
ويقوم حي يتعزوا با اخته دليّل
وشلون الامجاد تبنى باسم رعبوبه
ويشرب من الموت مع فنجالٍ مهيّل
لا صار نار العمر من عصر مشبوبه
ولمن بان المحال بدمعة العيّل
ييوقف بنص حلق الرجل مشروبه
والأبيض اللي يجي ممزوج ومنيّل
ابلاده اقصى الخيال وهاذي دروبه
يا مشرق النور لا من الوهج خيّل
ما عاد تطري على العالم سوى التوبة