كتبت فيك الشعر لجل أني أعجبك
بس أنت ما تفهم ولا عندك أحساس
كنت أتمنى بس لو بيت يجذبك
لا واحسافه يالحبر فوق كراس
اظمى وغيري يعطشك ثم يشربك
الله عطاك الغير وعروقي ايباس
اتعبت قلبي جعل الأيام تتعبك
ويبلاك ربي في هوى كله اتعاس
ضحيت ثم وفيت وازريت لا اكسبك
لين أوقفتني عزةٍ مالها اقياس
واليوم لا والله ماني بغاصبك
برفع قصيدي عنك وأقول لا باس
ماني بولي أمرك على شان أحاسبك
يالي خفوك شين والطيبة الباس
عطيتك اكبر من مقامك ومطلبك
ليت اندفاعي ما حصل عقبه إفلاس
جيت بتواضع لكن الكبر جنبك
خسرتني وإلا أنت قصرٍ بلا ساس
وحرف القصيد الي مدح بك ولا أطربك
عانه على فرقاك يضرب لك أجراس
قول لغرورك عزتي دوم تغلبك
لو كنت غالي.. عزتي ما لها اقياس
والمعذرة كانه قسى قلب صاحبك
إن كنت تشعر بالقساوة وإذا حاس..!
وان كان يجرحك العتب يوم أعاتبك
الله يسامحني إذا عندك أحساس