تهيا يالقصيد الي كتمتك غيض مدري خوف
على أطراف الدروب اسرج خيولك واطلق عناني
وأنا لو طال بي صمتي وحدتني عليه ظروف
طويل الصمت لكني كثير الي على لساني
والا يا درب تجحدني وأنا احسب صوتي المألوف
يمرك لو تفرقنا.. غريبه كيف تنساني
عقب ماحنا معازيبك غدينا في ذراك ضيوف
ابتسكع على أرصفتك ولو عزمت نكراني
وعلى ضوء الحنين الي سرق منك الظلام حروف
عزف نايه وغنالك وجر بصوته الحاني
حبيبي جفت أقلام القصيد وجيت لك ملهوف
وأنا ياخل ماهاب الظلام وجيت وحداني
تمادى واكشف أوراقك معي والعب على المكشوف
أنا ما جيت ابشكي لك وأفضفض لك عن أحزاني
يقال الفرصة الي ما تغانمها عليك تطوف
وأنا أقول الفرص لجلك تطوف وتنخلق ثاني
تعال ولملم أوجاعك بصدري والشقاء منصوف
على شانك ولا أبي شي مدامك جيت من شاني
تعدتك الملامة لو لحقك من الضمير حسوف
أنا لو جارت الدنيا عليك أرخيت جنحاني